ستاسو په څېرو کې عالي درجو ته د رسېدو جرئت او قوت ښکاري

0 54

جمهوررئیس د خوست روزنتون ماشومانو ته په خطاب کې: ستاسو په څېرو کې عالي درجو ته د رسېدو جرئت او قوت ښکاري

د افغانستان د اسلامي جمهوریت جمهوررئیس محمد اشرف غني نن مازیګر د خوست ولایت د شهید سلطان محمود خیرخواه روزنتون ماشومانو سره وکتل.

په دې کتنه کې چې په چهارچنار ماڼۍ کې ترسره شوه، لومړی د کورنیو چارو وزارت د پالیسۍ معینې حسنا جلیل د ماشومانو د حقونو ملاتړ پالیسۍ او د ماشومانو د حقونو ملاتړ لپاره د مشورتي پروسې پیلولو، د امنیتي ځواکونو په لیکو کې تر ۱۸ کلنۍ د کم عمره ماشومانو د ګمارل کېدو مخنیوي او د پولیسو له لوري په غوره ډول د ماشومانو د حقونو ملاتړ قانون ساتنې په اړه، معلومات ورکړل.

هغې زیاته کړه، موږ لومړی دغه پروسه د دارالتادیبونو او روزنتونونو ماشومانو څخه پیل کړې چې د خوست ولایت روزنتون ماشومانو په متفاوت ډول زموږ کوربه توب وکړ.

حسنا جلیل وویل، موږ د ملي پولیسو په استازیتوب د دې ماشومانو ملاتړ کوو او زیاته یې کړه، دغه ماشومان د یووالي، یو بل منلو او راتلونکې ته پاملرنې ارزښتونو پر اساس ژوند کوي او هر یو یې غواړي د ټولنې د ګټورو افرادو په توګه راڅرګند شي.

وروسته د خوست والي محمد حلیم فدایي خبرې وکړې او یتیمانو او بې سرستو ماشومانو ته د جمهوررئیس د پاملرنې او دا چې د ماشومانو د حقونو ملاتړ قانون یې توشیح کړ مننه وکړه وې ویل، د خوست ولایت د کار او ټولنیزو چارو ریاست سره ۴۳۸۹ شهیدان ثبت شوي دي.

هغه د خوست ولایت د ماشومانو حمایوي مرکز د ودانۍ د تجهیز او پراختیا، د دولتي کارکوونکو ماشومانو لپاره د وړکتون جوړولو، د شهیدانو کورنیو ته د سرپناه برابرولو او د خوست ولایت د ماسټر پلان د نهایي کولو غوښتنه وکړه.

ورپسې د کار او ټولنیزو چارو وزارت سرپرست سید انور سادات خبرې وکړې وې ویل، دغه وزارت په ۶۸ روزنتونونو کې د لس زره ماشومانو ملاتړ کوي. هغه له جمهوررئیس څخه له ۸۰ څخه ۱۱۵ افغانیو ته د روزنتونونو د ماشومانو د اعاشې زیاتوالي، د روزنتونونو د مقررې توشیح او نافذېدو او په دې مقرره کې د هغو ماشومانو شاملول چې ذهني ځنډ لري، له امله مننه وکړه.

د کار او ټولنیزو چارو وزارت سرپرست وویل، د ترکیې په مرسته په بدخشان، بلخ او د کابل په علاء الدین الحاقیه کې درې روزنتونونه ګټې اخیستنې ته سپارل شوي او د نویو فعالو شویو روزنتونونو لپاره د ۴۴۲ کسانو ګمارنې ته اړتیا لرو.

په دې کتنه کې د خوست روزنتون د یتیمانو په استازیتوب بصیر خان خبرې وکړې او ۵۰۰ تنو ته د خوست ولایت د شهید سلطان محمود خیرخواه روزنتون د ظرفیت لوړولو، یتیمو ماشومانو ته د ورزش زمینې برابرولو ته د پاملرنې، لېسې ته د روزنتون د ښوونځي د لوړولو او په دې روزنتون کې د نورو یتیمو ماشومانو د شاملولو په اړه یې خپل وړاندیزونه جمهوررئیس سره شریک کړل.

جمهوررئیس غني د هغوی د خبرو تر اورېدو او ترڅنګ یې په یتیمو ماشومانو د شفقت ترڅنګ وویل، تاسو زما زامن او لوڼي یاست او تاسو پوهېږئ چې د اسلام لوی پیغمبر حضرت محمد (ص) یتیم و او دا په دې معنی ده چې یتیمان لوی کارونه ترسره کولای شي.

جمهوررئیس له بصیر خان څخه چې د روزنتون د نورو ماشومانو په استازیتوب یې په جرئت او وضاحت د هغوی غوښتنې وړاندې کړې مننه وکړه وې ویل، د کالیو او نورو اړتیاوو پوره کولو لپاره تاسو ته دوه سوه زره افغانۍ هدیه کوم او همداراز د ورزش په برخه کې پنځه سوه زره افغانۍ مرسته کوم.

د هیواد جمهوررئیس د خوست ولایت خلکو د شجاعت او زړورتیا د ستایلو ترڅنګ وویل، ستاسو نورو وړاندیزونو ته د رسېدو په موخه به یو پلاوی خوست ولایت ته سفر وکړي.

جمهوررئیس پوهنې وزارت ته لارښوونه وکړه چې د خوست ولایت د شهید سلطان محمود خیرخواه روزنتون لېسې ته د ابتدائیه ښوونځي د لوړولو په اړه خپل وړاندیز ترتیب کړي.

جمهوررئیس د خپلو خبرو په پای کې یتیمو ماشومانو ته په خطاب کې وویل، تاسو هغه وخت خپلو هیلو ته رسېدلی شئ چې درس او سبق ووایئ او د دې کار جرئت او قوت ستاسو په څېرو کې ښکاري.

د دې کتنې په جریان کې، د خوست ولایت د شهید سلطان محمود خیرخواه روزنتون ماشومانو یوه ترانه وویله او د ماشومانو د حقونو د ملاتړ له امله یې جمهوررئیس ته لوح تقدیر ډالۍ کړ.

Image may contain: 1 person, sittingImage may contain: 1 person

Image may contain: 9 people, people sitting

Image may contain: one or more people

Image may contain: one or more people

Image may contain: 16 people, people sitting

Image may contain: 1 person, sitting and beard

Image may contain: 8 people, people standing

Image may contain: 8 people, people standingImage may contain: 7 people, people standingImage may contain: one or more people and indoorImage may contain: 4 people, people standing

Comments
Loading...