د افغانستان تر ټولو ډېرې پيسې په هغو ملايانو مصرفيږي/ اباسین بریال

0 401

د افغانستان تر ټولو ډېرې پيسې په هغو ملايانو مصرفيږي، چې افغانستان ته یې خير يوه زره او شر يو عالم دی. ملا فضل الهادي شينواري چې خپله شتمني ثبتوله نو ويلي يې و، چې درې لکه پسونه رمه لري. ملا کشاف له حکومت څخه د مياشتې څلويښت زره ډالر په دې پلمه اخلي، چې وزير اکبرخان کې يې ملايانو ته حويلۍ کرايه کړې دي. د ملا رحماني د دسترخوان مصرف دیرش زره ډالره و. ملا تره خيل یوسل ديرش شخصي ګاردان لري. د سولې په شورا کې ناست ملايان او ملا سناتوران ټول د حکومت په حق سکوت چليږي. هغه ملايان چې له حکومت سره دي، داسې فکر کوي، چې په خپل فزيکي حضور سره يې له سره کافر نظام نه سپين اسلامي نظام جوړ کړی دی.
پاکستان بيا ډېرو محدودو ملايانو ته سرکاري معاش ورکوي خو په مکمل ډول يې د سياست لپاره کاروي. مولانا سميع الحق وايي، افغان ملايان مې زامن دي، وزيرستانونو کې عمليات روا دي ځکه هلته ترهګر پټ دي او افغانستان کې جهاد روا دی، ځکه دلته يرغلګر پراته دي. موږ د مولانا سميع الحق په څير لااقل يو ملا هم ونه درلود، چې ووايي پاکستان کې جهاد روا دی، ځکه حکومت يې د یرغلګرو ملاتړی دی، پاکستان کې فاحشه خانې دي، پاکستان کې د ډرون مرکزونه دي، او پاکستان د نړۍ د یرغلګرو پراپرټي ده. زموږ شيخ الحديث او پروفيسران د فتوا له جراته ډاريږي خو پاکستان کې د کرکېټ کېلاړي عمران خان هم د فتوا سويه لري. زموږ ملايان دکور زمريان د صحرا ګيدړې دي، د پاکستان ملايان د پاکستان د بهرني سياست زمريان دي.
که زموږ ملايان په ځان ډاريږي، نو خلاصون يې نشته، سياف به په پغمان کې کوټه قلفي وي او رحماني به په مرمۍ ضد لنډکروزر کې ترورېږي، رباني به په ميلمستون کې وژل کېږي او ملا کشاف به له ټول احتياط سره دبل په جنازه کې د خرمرګي يا ځانمرګي ښکارشي. يا دې حکومت دا په خپله ساه مين ملايان له ځانه ورټي او يا دې له پنځو زرو ملايانو څخه د یو مولانا سميع الحق کار واخلي.

Leave A Reply

Your email address will not be published.