روحاني: ایران کې د اوبو کمښت خطرناک دی

0 106


د ایران ولسمشر حسن روحاني د دې هېواد د انرژۍ له وزیر او په دې برخه کې له خپلو سلاکارانو سره په یوه غونډه کې ویلي چې په ایران کې د اوبو کمښت ګواښوونکی دی. هغه په دې اړه د خواشینۍ په څرګندولو سره ویلي چې ایران کې د اوبو د ذخایرو کمېدل به خورا بدې پایلې ولري. نوموړی دا څرګندونې په داسې حال کې کوي چې په دې هېواد کې د اوبو د کمښت او یو لړ نورو ستونزو له امله په وار وار په یو شمېر ښارونو کې لاریونونه هم شوي دي. روحاني دا وضعیت بحراني یاد کړی دی او ویلي یې دي چې که په دې برخه کې عاجل اقدامات ونه شي ښایي وضعیت لا ترینګلی شي. د یادونې ده چې ایران څو ورځې مخکې په تهران کې د اوبو په اړه یوې جوړې شوې غونډې ته د افغانستان د اوبو او انرژۍ مرستیال هم ورغوښتی و او ورسره یې یاد هېواد ته د هلمند سیند د تلونکو اوبو پر سر خبرې کړې وې، که څه هم تر اوسه د یادې ناستې بشپړ جزیات نه دي خپاره شوي خو وړاندې تر دې ایران د هلمند سیند اوبه خپل حق بللې او ترې یې په وړیا توګه د استفادې غوښتنه کړې ده.

Comments
Loading...