اوسني کوچیان خوشبخته دي/ عابد

0 47

له کږدۍ تر پوهنتونه، د یو کوچي ځوان ګل ولي ژوندلیک دلته ولولئ:

لومړی چوپان وم، وروسته له غره سمې ته راښکته شو، د ننګرهار خوګیاڼو په یوه لرې پرته سیمه کې مو ژوند کاوه، زموږ لپاره ښوونځی نه ؤ،  د خپلو مالونو او رمو سره د سپين غر په لمن کې استوګن شو، وروسته ولسوالۍ ته نږدې په یوکلي کې خالي کور کې همسایه شو، موږ به همد مالداري کوله او هم په یوډول کلیوالي ژوند ته را وګرځیدو.

عمر به مې له ۱۵ کلونو پورته ؤ، خو ښوونځی می لا په سترګو نه ؤ لیدلی، د دغه کلي څخه چې موږ په کې میشت ؤ هر سهار ډلې ډلې ځوانان او ماشومان ښوونځیو ته تلل، وروسته مې شوق پيداشو، پلار ته مې وویل چې زه هم غواړم ښوونځي ته لاړ شم، لومړی مې کورنۍ مخالفت کاوه او ویل به يې که ته ښوونځي ته لاړ شي نو مال به څوک وڅروي.؟؟

وروسته مې مشر ورور ته وویل هغه کورنۍ رازي کړه، په همدې عمر ښوونځي کې شامل شوم، کله چې صنف ته ولاړم نو ټول ټولګیوال مې تر ما نیم عمر کوچنیان وه، د شرمنده ګي احساس مې کاوه ان دوی ته په کتو مې بیرته د ټولګي دپرېښودو تکل وکړ، خو د همدې ښوونځي یو استاد او په کلي کې زموږ کلیوال احمدالله ښه تشویق کړم، بالاخره مې په خلاصه سینه ښوونځي ته مخه کړه.

کلونه تیر شول او بالاخره له ښوونځي فارغ شوم، زه د کورنۍ لومړی اولاد وم چې په لیک لوست پوه شوم، ښوونځی مې ولوست او د دولسم سند مې واخیست.

له فراغت وروسته د ګوتو په شماره کلونه له زده کړو بیا محروم شوم، باالاخره مې د هغه کلک تصمیم او هوډ د پوره کولو لپاره د کانکور ازموینه ورکړه او تر پوهنتون مې لار پيدا کړه، دښوونې او روزنې پوهنځی مې ولوست.

د فراغت غونډې ته مې سپين ږیری پلار راسره بیولی ؤ، کله يې چې زه د غونډې په مخ کې د پوهنتون د تصدیق پاڼې د اخیستو پرمهال ولیدم نو له خوښۍ يې له سترګو اوښکې راغلې، ما په لومړي ځل خپل پلار ولید چې د خوښۍ اوښکې يې بهیږي.

اوس چې ګورم د کوچیانو لپاره کار کیږي، د زده کړو زمینه ورته برابریږي او ان د کوچیانو چارو سمون لوی ریاست په همکارۍ د لوړو زده کړو وزارت ورته توجه کوي له زړه خوشالیږم. زموږ دغه نسل بختور دی، په ګرد افغانستان کې ورته د کوچیانو چارو سمون لوی ریاست له لوري د معارف وزارت سره په همغږۍ سلګونه سیار ښوونځي فعال دی، چې زرګونه تنه په کې زده کړې کوي.

د دوی اینده روښانه ده، زرګونه اولادونه به د زده کړو په کولو دخپلو والدینو په سترګو کې د خوښيو اوښکي وګوري. له همدې امله د کوچیانو چارو سمون لویې ریاست له مشرتابه منندوی یو اوغوښتنه مو ترې داده چې د کوچي ماشومانو لپاره د زده کړو بهیر همداسې فعال وساتي، څو دهرې کوچي کورنۍ په انګړ کې دعلم څراغونه روښانه شي.

Comments
Loading...