د کرکټ آسیايې جام سیالیو لمړنۍ بریا

افغان اتلانو د آسیایې جام سیالیو سفر په بریالیتوب سره پیل کړ او د سریلانکا غښتلي ټیم ته يې په ۹۱ مڼدو ستره ماتې ورکړه، د افغانستان ټيم پچه وګټله او لمړې یې د توپ وهنې پریکړه وکړه چې د ټولو لوبغاړو په سوزیدو یې ۲۴۹ منډی وکړي او مقابل لوري ته یې ۲۵۰ منډو هدف وټاکه، په توپ وهنه کې رحمت شاه د۷۲ منډو، احسان الله جنت د ۴۵ منډو، حشمت الله شهیدی د ۳۷ منډو او شهزاد محمدي د ۳۴ منډو په ترسره کولو ښه وځلیدل.

په توپ اچونه کې مجیب زدران، راشید خان، محمدنبي، ګلبدین نایب، د دوه دوه لوبغاړو په سوزولو د سریلانکا ټول ټیم په ۴۱،۲ اورونو کې د ۱۵۸ منډو له ترسره کولو وروسته له مخې لرې کړ او لوبه یې په خپل نوم کړه، آفتاب عالم هم نن ښه توپ اچونه وکړه خو د کوم لوبغاړي په سوزولو کې ورسره بخت یاري ونکړه.

رحمت شاه د غوره توپ وهنې په کولو سره د ننۍ لوبې غوره لوبغاړې وټاکل شو، او د غوره لوبغاړي جایزه یې ترلاسه کړه.

افغان اتلانو نن د توپ نیوني په برخه کې هم خپله وړتیا وښوده او دا يې ثابته کړه چې دوی کولای شي اوس له لویو لویو ټیمونو سره ډغره ووهي او سرخوږې ورته جوړ کړی، د یادونې وړ ده چې د ننۍ لوبې په بریا سره افغان اتلانو د آسیا جام سیالیو دویم پړاؤ ته لار پیدا کړه او په دویم پړاؤ کې به له بنګلادیش، پاکستان او هند سره زور آزمایې.

د افغانستان د ټیم د لومړي پړاؤ دویمه لوبه له بنګلادیش سره د سپتمبر په ۲۰ د پنجشنبی په ورځ ده.

د ننۍ لوبې بریا دې ټولو هیوادوالو ته مبارک وي!

 

او افغان اتلانو ته له لویه خدایه په راتلونکو لوبو کې لویې بریاوي غواړو. 

Categories: خبرونه,کرکټ

Tags:

خپل نظر ولیکۍ

Your email address will not be published.