سپېڅلی رهبر / مجید ژړاند

0 23
دا هماغه وزیرستان دی، چې سامراجي پوځیانو له خاورو سره برابر کړ، بې شمېره واړه، زاړه او ځوانان یې له تېغه تېر کړل.
دا هماغه وزیرستان دی، چې پنجابي وحشي پوځ د خلکو حیا او عزت لوټ کړ، دا هماغه وزیرستان دی، چې پوځ او ترهګرو یې زوړور خلک ژوند ته نه پرېښودل، ترهګرو او پوځ دواړو پرې زړونه یخ کړل، د کاروبار ځایونه یې پنجاب وحشي سامراج پوځ ور ختم کړل، بازارونه وسوځېدل، ځوانانو پښو ته زولنې ور ولوېدې، دلته ژوند مرور و.
نن هماغه د ایپي فقیر ټاټوبي ولسونه راپاڅېدلي او منظوري ناره بدرګه کوي، پښتون ته ژوند غواړي، له امو تر اباسینه د پیوستون غږونه کېږي، پنجاب وېرې اخیستی دی، وېره یې بې ځایه نه ده، ځکه دلته کلونه پخوا ایپي فقیر پرنګی ځغلولی و، بیا یې د پنجابي استعمار پر ضد د ازادۍ سنګر تود ساتلی و.
نن د ایپي فقیر له مړیني نه نهه پنځوس کلونه اوړي، خو په سوځېدلي وزیرستان کې منظوري چیغې ( پښتون ژغورنې) ولسونه راپارولي او  سامراجي دښمن د خپلې ماتې حقیقت ته رسېدلی دی، دا ملت نه مري، له امو تر اباسینه د پیوستون چیغه په حقیقت بدلوي.
 دا سپېڅلی بغاوت او منظوري چیغه بدرګه کول مو له پنجابي اشغاله د خلاصون یواځینۍ لاره ده.
د وطن ملالو د پښتون ژغورنې ملا ورتړلې او په هره جلسه کې یې په خپل پیاوړي حضور یې  پنجابي ریاست وېرولی دی او د خپلو ورونو سره یو ځای یې  د پښتون ژغورنې  غورځنګ غښتلی کړی دی.
 وزیرستان مېړني ولسونه دې ویاړلي او سرلوړي وي، موږ خپلو هیلو ته نژدې شوي یوو او د سپېڅلي رهبر منظور پښتون  تر قیادت لاندې د لوی افغانستان حقیقت ته رسېدونکي یوو.
Comments
Loading...