راځئ دا زده کړو چې چیرته او څه وخت مطالعه وکړو؟ 

0 61

ژباړه: محمدآصف حلیمي 

که غواړئ د مطالعې لۀ ګټو برخمن شئ نو د مطالعې اصول او شرایط زده او د مطالعې پر مهال یې عملي کړئ .

راځئ دا زده کړو چې چیرته او څه وخت مطالعه وکړو؟ 
الف : د مطالعې ځای 
د مطالعه ځای باید مرتب او منظم وي (دا کار د ذهني نظم باعث کیږي او د حافظې په تقویه کې رول لري.) د مطالعې ګټې هغه وخت حاصلیږي چې بې له ستړیا ، له شور ماشوره لرې په ارامه فضا کې په پوره صمیمت او رضایت سره وشي. په کور یا دفتر کې هغه خونه د مطالعې له پاره وټاکئ چې له پوره طبیعي رڼا او له خارجي او داخلي مزاحمو اوازونو څخه لرې وي.

د مطالعې د ځای اړوند دا څو ټکي مهم دي:
۱ـ بعضې خلک په ارامه فضا کې مطالعه کولای شي او څوک شورماشور ته ترجیح ور کوي ، څوک په ناسته ښه مطالعه کوي ، د چا پر څوکۍ کېښناستل خوښيږي او ځینې د قدم وهلو پر مهال مطالعه کوي ، دلته دومره ویلی شو چې په هغه حالت کې مطالعه وکړئ چې نسبتا تاسې پکې ارامه یاست .
۲ـ کله چې د مطالعې له پاره ځای وټاکئ نو سمدستي مطالعه شروع کړئ ؛ دا وخت له نورو کارونو او بوختیاوو ځان وساتئ ځکه دا کار د حواسو د انحراف او ستړیا سبب ګرځي.

۳ـ مطالعه د ځینو خاصو شېبو او ځایونو سره ملګرې کړئ مثلا: نرم نرم باران دی ، چتري درسره واخلئ او مطالعه پیل کړئ یا په یوه تاریخي ځای کې مطالعه وکړئ. ښایي دا شېبې او هغه څه چې له مطالعه اخلئ په اسانه هېر نه کړئ.

۴ـ د تودوخې درجه ، د طبیعي نور یا رڼا اندازه او د څوکۍ شکل او نور … شرایط باید داسې ونه اوسي چې د خوب طرف ته مو ټېل وهي.
۵ ـ د مطالعې په ځای کې ښه هوا او زیات اکسیجن یو مهم شرط دی.
ب: د مطالعې وخت :
د مطالعې وخت د خلکو له پاره مختلف دی یعنې کوم مشخص وخت نه دی معلوم چې باید مطالعه پکې وشي . یو شمېر خلک په شپه کې مطالعه کوي او ځینو بیا سهار د مطالعه له پاره ټاکلی وي خو سهار وخت له نورو وختونو مناسب وخت دی ځکه په سهار کې د انسان ذهن له څو ساعتونو استراحت او ارام وروسته بیخي دې تیار وي چې شیان ښه حفظ کړي. لکه څنګه مو چې لوړ وویل د مطالعه له پاره دقیق وخت چا نه دی ټاکلی ، هر وخت چې څوک ځان جسمي او رواني ښه احساس کړي او وپوهیږي چې مطالعه کولای شي نو سمدستي دې مطالعه پیل کړي.

Comments
Loading...