پاکستان ته یو ځل بیا د کونړ د لرګیو قاچاق زور اخیستی دی

د رسنیو د راپورونو له مخې د کونړ په څو ولسوالیو کې د ځنګلونو پرې کول پيل شوي دي او پاکستان ته ددغو لرګیو قاچاق زور اخیستی دی. د کونړ د کرنې رییس ویلي، سره له دې چې د ځنګلونو په پرېکولو کې کموالی راغلی خو بیا هم په اسمار، څوکۍ او چپه درې ولسوالیو کې د ځنګلونو پرې کول ادامه لري. دده په خبره د سیمه ییزو خلکو یوه کمېټه جوړه شوې، چې باید د ځنګلونو د پرې کولو مخه ونیسي. همدا راز وايي چې د کرنې وزارت ورسره په روان کال کې د ځنګلونو د ساتنې په موخه د دوه سوه میلیونه افغانۍ مرستې ژمنه هم کړې ده. بل پلو ځینو سرچینو رسنیو ته ویلي چې له څو ورځو راهیسې په ناړۍ ولسوالۍ کې هم د ځنګلونو پرې کول پیل شوي او دغه لرګي بیا خیبر پښتونخوا او د پاکستان ځینو برخو ته قاچاق کېږي. سرچینې دا هم وایي چې د ځنګلونو په قاچاق کې افغان چارواکي لاس لري. د معلوماتو له مخې په تېرو شلو کلونو کې ۲۵ میلیونه متره مکعب ځنګل په کونړ کې پرې شوی او لرګي یې پاکستان ته قاچاق شوي دي. د کونړ د کرنې رییس بیا له سپوږمۍ راډیو سره په خبرو کې وویل، چې پاکستان ته د لرګیو په قاچاق کلک بندیز دی او هېڅوک نه شي کولی دغه لرګي ولېږدوي. هغه وویل ان له یوې ولسوالۍ بلې ته هم څوک لرګي نه شي لېږدولی.

سپوږمۍ رادیو

Categories: خبرونه

خپل نظر ولیکۍ

Your email address will not be published.