١١٠ زره ماشومان د پوليو له واکسينه پاتې کېږي

 

ځايي چارواکي وايي، د طالبانو له خوا د اجازې نه ورکولو له امله په روزګان کې ١١٠زره ماشومان د پوليو له واکسينه پاتې کېږي.

په دې ولايت کې د واکسین په هره دوره کې باید نږدې ٢٠٠ زره ماشومان واکسين شي، خو دا ځل يوازې ٨٠ زره ماشومان واکسين کېږي.

د دې ولایت د عامې روغتيا رييس ډاکټر خان اغا مياخېل وايي، په دې کمپاين کې به د دې ولايت تر نيمايي کمې سيمې تر پوښښ لاندې راوستل شي.

هغه زياته کړه، وسله‌وال طالبان تر خپل واک لاندې سيمو کې کور په کور واکسین ته اجازه نه ورکوي او د طالبانو غوښتنه دا ده چې دا بايد په جوماتونو کې وشي.
خو مياخېل وايي، د هغوى دا غوښتنه د روغتيا د نړيوال سازمان له‌خوا د منلو وړ نه ده.

Categories: خبرونه