سیګار؛ په یوه رغنیز پروګرام کې سلګونه میلیون ډالر ضایع شوي

سیګار یا د افغانستان بیا رغونې د څار امریکايي بنسټ وايي، په افغانستان کې د امریکا د دفاع وزارت د بیارغونې د یو پروګرام په ترڅ کې سلګونه میلیونه ډالر ضایع شوي دي.
د کاروبار او ثبات د عملیاتو د ماموریت په نوم دا پروګرام د ۲۰۱۰ کال څخه تر ۲۰۱۴ میلادي کال پورې د امریکا د دفاع د وزارت په چوکاټ کې پر مخ بیول کېده چې هدف یې په افغانستان کې له پوځي عملیاتو سره هم‎مهاله اقتصادي او انکشافي وده وه چې د امریکا کانګرېس ورته ۸۲۳ میلیونه ډالر منلي و.
سیګار زیاتوي، له دې پيسو څخه ۶۷۵ میلیونه ډالر په داسې پروژو لګول شوي چې ډېرې یې د امنیتي اندېښنو، خرابو طرحو او نورو ستوتزو له کبله نیمګړې پرېښودل شوې.
سیګار لیکي، د دې څلور کلن پروګرام په ترڅ کې د هغو ۳۱۶ میلیونو ډالرو څخه چې په مستیقمه توګه په افغانستان کې د بیارغونې د پروژو پر قراردادونو لګیدلي، یوازې ۲۲ فیصده یې چې ۷۰ میلیونه ډالر کېږي، پر داسې پروژو لګول شوي چې په بشپړه توګه پر معیارونو برابرې او سپارنې ته چمتو وې.
پاتې څه باندې ۲۴۶ میلیونه ډالر یې چې په مستقیمه توګه د لګول شویو پیسو په سلو کې ۷۸ برخه جوړوي، پر داسې پروژو لګول شوي چې یا نیمګړې او یا هم په بشپړه توګه کارولو ته چمتو نه ‎وې.

Categories: ورځنۍ تودې پېښې او خبرونه