عمران خان: په افغانستان کې به «نوی‌حکومت» رامنځته شي

0 46

د پاکستان لومړي وزیر عمران خان تازه څرګندونې د یو خپلواک هېواد پر وړاندې ښکاره لاس وهنه ده.
دا خبر داسې مهال کېږي چې پرون جمعه عمران خان په باجوړ سیمه کې خلکو ته وویل، “په افغانستان کې به یو «ښه‌حکومت» جوړ شي، داسې حکومت چې د ټولو افغانانو استازیتوب به وکړي. جګړه به پای ومومي او په افغانستان کې به سوله تامین شي.”

عمران خان په خپلو خبرو کې د «نوي حکومت» خبره داسې مهال کوي چې تازه له طالبانو سره شپاړس ورځنۍ مذاکراتی دور پای ته ورسېد.
تېره پنجشنبه د کب پر ۲۳مه د افغانستان د ملي امنیت شورا سلاکار حمدالله‌محب هم پر امریکایي مرکچیانو تور پورې کړی و چې امریکایي مرکچي پلاوی غواړي افغان حکومت په سوله پروسه کې څنډې ته کړي.

د پاکستان حکومت دا څرګندونې داسې مهال کوي چې محب ویلي وو، د وروستیو مذاکراتو وروستي جزئیات له دوی سره نه‌دې شریک شوي، خو پاکستان د نوي حکومت خبر ورکوي.
تر دې مخکې د پاکستان د بهرنیو چارو وزیر شاه‌محمود قریشي هم له ۱۶ورځینو مذاکراتو وروسته په سوله پروسه کې د پرمختګونو خبره کړې وه.
په‌دې تړاو ولسمشر غني هم ویلي وو چې “طالبان باید د سولې پروسې او په ټوله کې واضح کړي چې له پاکستان سره څه ډول اړیکه لري”.

د عمران خان د خبرو په تړاو وسله‌والو طالبانو کوم غبرګون نه‌دی ښوودلی.

اوس چې د پاکستان لومړي وزیر په ښکاره د نوي حکومت خبره کوي، افغان شننونکي په‌دې باور دي چې دا په افغانستان کې ښکاره لاس‌وهنه ده.
سیاسي شننونکي نجیب منلی وایي، “پاکستان تل هڅه کړې افغانستان یې د لاس اله وي. دوی تل په خپلو کارونو او څرګندونو کې ښودلې چې غواړي افغانستان یې تر لاس لاندې دی”.
هغه زیاتوي، “د پاکستان تازه څرګندونې په افغانستان کې د ښکاره لاسوهنو ثبوت دی”.
تر اوسه دولتي چارواکو د عمران د خبرو په تړاو کوم نظر نه‌دی ښودلی.

Comments
Loading...