طالبان دې جرئت وکړي

خیال محمد سهار

0 47

هم سوله اسانه ده، هم یې مذاکرات اسانه دي، خو په دې شرط چې طالبان جرئت وکړي. د سولې مذاکراتو لپاره د پاکستان او القاعده په ګډون له ټولو تروریستي ډلو او بهرنیو کړیو سره خپلې ناتعریف شوې اړیکې پرې کړي. ولس ته مراجعه وکړي، په خپلو کړنو پښېماني وښیي او په عمل کې دا ثابته کړي چې دوی د سولې پلویان او غوښتونکي دي.

افغانان سولې ته اړتیا لري، حتی تر خوړو او تنفس هم سولې ته زیات اړ دي، ځکه پوره څلوېښت کاله وشول چې په یو نوم او بل نوم وژل کېږي، خصوصا له تېرو اتلسو کالو کې چې په افغانانو کومې بدې ورځې راغلې لا یې هم تاریخ ډېرې لږې بېلګې لري. دوی د نورو جنایتونو او وحشتونو د زغم تاب نه لري.

سوله د افغانانو او ولسمشر محمد اشرف غني مهم لومړيتوب دی دا چې ټرمپ له طالبانو سره د افغان سولې مذاکرات ودرول دا په دې معنا نه شو چې په دې سره یې د افغانانو هيلې په سیند لاهو کړې، بلکې دا په دې مانا وو چې له افغانانو او افغان حکومت مه واره هیڅ بهرنی او کورنی لوری د سولې مذاکرات په بریالیتوب سره نشي ترسره کولی.

محمد اشرف غني دا ځل غواړي چې د سولې خبرې مخامخ له طالبانو سره پېل کړي او په دې مذاکراتو کې به له طالبانو او افغان حکومت پرته بل هيڅوک هم ښکېل نه وي او نه به هم بل چا ته پکې اجازه ورکړي چې دخالت په کې وکړي ځکه چې سوله به د افغان ولس او طالبانو تر منځ کېږي او دا دواړه خواوې چې په هر څه یې توافق   سره وکړ همغه به کېږي، خو په دې شرط چې طالبان جرئت وکړي او له پاکستان څخه خپله لمن راټوله او خپل استقلالیت اعلان  او ثابت کړي.

 

Comments
Loading...