د کرونا فرهنګي اړخ

ایمل جلال

0 70

د یوې فرهنګي پدیدې په توګه ټول دینونه ځانله حق ورکوي چې په هر شي کې کار ولري او د کرونا وایرس ترې هم په امان کې نه دی. دینونه تل هڅه کوي چې لکه د کرونا په څېر د هرې نوې پدېدې په تعریفولو سره په ټولنه کې خپل مشروعیت بیا ځلي تولید کړي. په چین، جنوبي کوریا، جاپان او حتا اروپا کې دیني بنسټونه ورته د الهي عذاب په سترګه ګوري او په معبدونو او کلیساګانو کې جمعي آینونه ورته نیسي. حتا جالبه ده چې په جنوبي کوریا کې په کرونا د اخته ناروغانو ډیری برخه یې د یو دیني طریقت مریدان دي. دوی هڅه کوله چې په دم او دعا ددې مخه ونیسي خو ټول پرې په کلیسا کې اخته شوي. حکومت مجبور شو چې د دې طریقت د ۲۱۹ زره غړو لست له کلیسا واخلي تر څو ټول معاینه او شکمن یې قرطین شي.
یو شمېر هندوان چې غوښه نه خوري؛ ادعا کوي چې خدای له انسانانو د حیواناتو د خوړولو له امله انتقام اخلي. په ایران کې یو ملا ځان د نبوي طب پلار ګڼي؛ سپارښتنه کړې چې له کرونا د خلاصون په موخه باید د شپې لخوا مالوچ غوړ او د مقعد په سوري کې کېږدئ!
افغانان چې دا ټول اوروي، پرې خاندي خو که ملا صبور ووايي چې کرونا په چین کې د اویغور پر مسلمانانو د چینايي حکومت د ظلمونو په بدل کې الهي عذاب دی؛ بیا یې ټول جدي نیسي. ملا انصاري هم پخوا ورته خبره کړې وه چې کله کرونا هرات ته را ورسېدله پرون بیا را پیدا شو او دا ځل یې ادعا وکړه چې کرونا د کفارو لپاره عذاب او د مسلمانانو لپاره امتحان او رحمت دی.
تېره شپه یو پوهاند ډاکټر او د طب استاد په ژوندون ټلوېزیون کې وویل چې څوک حلال رزق خوري؛ کورنا یې نه نیسي. ددې ترڅنګ د ماسک پر ځای د مسواک، په سابون د لاسونو مینځلو پر ځای د اودس او یا د روغبړ د نه کولو پر ځای د اذکارو او دعاګانو په ویلو ټینګار کېږي.
حقیقت دا دی چې د ټولو دینونو منطق یو دی او له بده مرغه دا همدا فرهنګي اړخ د کرونا په شیوع کې تر بل هر څه ډېر خطرناک دی. ځکه له انسانه احمق جوړوي او دې ته یې قانع کوي چې اول خو مسلمان یا هندو او یا عیسوي نه نیسي. که فرضاً ویې نیسي بیا الهی امتحان دی او که مړ شي نو هسې هم جنت ته ځي!
کله چې په هرات کې د کرونا مثبته واقعه ثبت شوه او خلک پوه شول چې شکمن کسان د ایران د قم له ښاره راغلي دي؛ په هرات او حتا په کابل کې ځینو خلکو د هزاره ګانو سره ارتباط نیول؛ په کرونا د اخته کېدلو سره معادل بلل. فرهنګي انګېرنه دا وه چې یواځې شیعه هزاره ګان قم ته ځي او حتماً دا مرض هزاره ګانو افغانستان ته راوړی دی. که څه د مبتلا شخص هویت معلوم نه دی. د کرونا له امله په افغانستان کې هزاره ګان ملامتول؛ په غرب کې د چینایانو د ملامتولو سره چندان توپیر نه لري.
خلاصه د ملا خبرو پسې مه ګرځئ او کرونا جدي ونیسئ. په رسنیو کې لارښونې تعقیب کړئ او د کرونا په مخنیوي کې مرسته وکړئ.

Comments
Loading...