د ولسمشر غني هڅونې او پاملرنې سرتېرو ته روحیه ورکړې

0 181

محمدبشیر یوسفزوی

د افغانستان په تاریخ کې به ولسمشر غني یو له هغو لومړۍ درجه مسوولینو څخه وي چې د هیواد په ډېرو سختو شرایطو کې یې د هیواد بېلابېلو ولایتونو، قول اردوګانو او روغتونونو ته سفرونه وکړل او هلته یې د هیواد هغه صادق بچيان چې شپه او ورځ د هیواد د دفاع، عزت او وقار لپاره په مېړانه جنګېږي نازولي، هغوی یې په غېږ کې نیولي، هغوی ته یې روحیه او ډاډ ورکړی، د دوی ستونزې یې نه یوازې اورېدلي، بلکې مناسبې حل لارې یې ورته لټولې دي.

د امنیتي او دفاعي ځواکونو په لیکو کې یې فساد له منځه وړی. هغوی ته یې دا ډاډ ورکړی چې له دې وروسته یې هیڅوک هم حق نه شي خوړلی او نه یې هم امتازه ضایع کېږي.ولسمشر غني د امنیتي او دفاعي ځواکونو په لیکو کې د اصلاحاتو په راوړلو او د هغوی تر منځ د مکافاتو او مجازاتو د اصل په تطبیق سره دغو ویاړلو ځواکونو ته د برابرۍ او عدالت احساس ورکړی او د تېر په څېر له بې عدالۍ او فساد څخه نه ځورېږي، ځکه له همغې لومړۍ ورځې څخه جمهور رئیس غني د امنیتي سکتور وزارتونو مسوولین د امنیتي او دفاعي ځواکونو په لیکو کې د هر ډول فساد مخنیوي ته وهڅول او هغوی چې په اصلاحاتو راوړلو او د فساد په مخنیوي کې پاتې راغلل او یا خپله په فساد کې ښکېل وو، نو له دندو یې ګوښه کړل او پرځای یې وړ او اهل کسان استخدام شول او د امنیتي او دفاعي سکتور اوسنۍ رهبري یې ښه بېلګه ده چې په ټول قوت د فساد پر ضد مبارزه، د قانون د حاکمیت هڅې او د افغانستان د دښمنانو د ځپلو او نابودولو هڅې کوي.

د ولسمشر غني د ځانګړې پاملرنې او لارښوونې په اساس د ملي تدارکاتو کمیسیون په اونیزو غونډو کې یې د فساد د مخنیوي په موخه د نورو وزارتونو او ادارو تر څنګ د ملي دفاع او کورنیو چارو وزارتونو ټول قراردادونه له سره وڅېړل او وارزول. په ټینګار سره یې ټولو ته هم هدایت ورکړ او هم اخطار چې د عسکر او سرتېري له اعاشې او امتیازاتو غلا ورته په هیڅ ډول هم د منلو وړ نه ده او عاملینو ته به سخته سزا ورکړل شي. له همدې امله په دې وروستیو کې د کورنیو چارو وزارت هغه قراردادي چې د سرتېرو له اعاشې یې شپږ سوه میلیون افغانۍ غلا کړې وه ونیول شو او دا مهال تر پوښتنو او څېړنو لاندې دی او باور دی چې په دې برخه کې به نور پام وړ اقدامات هم وشي.

جمهور رئیس د امنیتي سکتور مسوولینو ته د امنیتي او دفاعي ځواکونو د خوړو او درملو په کیفیت ټينګارکړی او په دې برخه کې یې پام وړ بدلونونه راوړلي، چې له امله یې د امنیتي او دفاعي ځواکونو اعاشه، البسه او درمل د کمیت او کیفیت له پلوه ښه شول. دا به د هېواد په تاریخ کې لومړی ځل وي، چې د هېواد جمهور رئیس دې خپلو امنیتي او دفاعي ځواکونو ته دومره ډېره پاملرنه وکړي وي، ځکه کله چې قول اردوګانو ته سفرونه کوي، نو له سرتېرو، بریدملانو او افسرانو سره په جلا جلا کتنو کې د دوی ستونزې پوښتي او بیا یې د حل په موخه د دوی له مسوولینو سره شریکوي او د تعقیب لپاره یې جدي لارښوونې کوي.

Comments
Loading...