د هسکې مېنې پېښه یوه فاجعه وه

اېمل پیاوړی

0 38

د افغانستان دښمنانو د جمعې په ورځ ماسپښین مهال په هسکه مېنه ولسوالۍ کې د جودرې سیمې اړوند پر یو جامع جومات د ماسپښین لمانځه د ادا کولو پرمهال برید وکړ او په لسګونو لمونځ کوونکي یې په ډېره بې رحمۍ شهیدان او زحمیان کړل. دا پېښه د خپل نوعیت له پلوه یوه فاجعه ده، د دغه ډول فاجعو د تکرار د مخنیوي لپاره باید ولس ویښ، بیدار او یو لاس شي.

فاجعه په دې خاطر ده چې په هغه کې ملکي وګړي د یوې سیمې وګړي، د یو قوم وګړي او تقریبا د یو کلي او کور وګړي په نښه شول، هلته یو وحشت او ماتم رامنځته شو. په دغه پېښه کې یو کلی تباه شو، دوی د مخې او د سر سړي په داسې حال کې له لاسه ورکړل چې نه یې چاته ازار رسولی و او نه په کوم بل داسې عمل بوخت وو چې خدای مکړه د چا د ځورونې لامل دې شي ، بلکې دوی یوازې د خپل خدای په طاعت او عبادت بوخت وو.

 د ناولي دښمن د وحشت اندازه له دغه برید څخه هم لګېدلی شي. دغه بدمرغه دښمن د دین او ایین په نوم هیڅ ارزښت هم نه پېژني او نه ورته درناوی لري. د دوی موخه یوازې او یوازې د ډېرو وینو بهول او د زیاتو خلکو وژل دي، دا زمینه چې هر چېرې دوی ته برابره شي، نو هملته برید کوي او عام خلک وژني. نور نو باید ولس ویښ شي، ولس باید له خپلې سادګۍ او خوشباورۍ څخه راووځي او پر دښمن رحم ونه کړي، ځکه پر دښمن د رحم انجام دغسې وي چې عام کلیوال په خپلو وینو ولمبوي.

د دغه ناولي دښمن چاره ډېره اسانه ده، خو اقدام غواړي. ولسونه دې له خپلو امنیتي او دفاعي ځواکونو سره همغږي او همکار شي. د خپلو کلیو او د خپلو کورونو او جوماتونو د خوندیتوب په موخه دې په مشکوکو مواردو سترګې نه پټوي. مشکوک موارد دې تعقیب کړي او ټول دې په ګډه د هغوی مخه ونیسي، که فکر کوي چې د دوی په وس نه ده، نو سملاسي دې امنیتي او دفاعي ځواکونو ته خبر ورکړي، تر څو د هغوی چاره وکړي. تعقیب یې کړي، وې نیسي، وې وژني او نابود یې کړي او په دې ډول عام خلک د هغوی له شرارت او وحشت څخه خوندي کړي.

Comments
Loading...