د عبدالله عکسونه او تعبیرونه

اېمل پیاوړی

0 73

 په دې وروستیو کې چې امریکایي پلاوي لکه د امریکا د بهرنیو چارو وزارت مرستیاله الیس ویلز، د امریکا د کانګرس مشره نانسي پلوسي او همدارنګه د متحدو ایالتونو د دفاع وزیر افغانستان ته سفرونه وکړل، نو ډاکټر عبدالله عبدالله ورسره داسې عکسونه اخیستي چې یا د قدم وهلو، یا د ولاړې او داسې حالاتو کې دي چې تر ډېره غیر رسمي حالتونه ښیي.

د عبدالله پلویان په ټولنیزو رسنیو کې داسې تبلیغوي چې ګواکې د عبدالله عبدالله اړیکې او مناسبات له امریکا سره ښه شوي او داسې ښیي چې ګواکې ممکن د ولسمشریزو ټاکنو په پایلو کې یې بریالی اعلان کړي او زیات نظر یې په عبدالله ده. دوی هڅه کوي چې له بهرنیو پلاویو سره د ډاکټر عبدالله عکسونه د خپل ټاکنیز ټيم په ګټه تعبیر کړي، مګر نه خلک ماشومان دي او نه هم دومره ساده ګان دي چې د هغه د پلویانو په تعبیرونو باور وکړي او همداسې وګڼي.

اکثره خلک په دې باور دي چې ډاکټر عبدالله نه یوازې بلکې د حکومت له لومړیو څخه په خپل ځان او فېشن کې ورک دی او د ویلو لپاره څه نه لري، نو په همدې خاطر مجبوره دی چې له بهرنیو پلاویو او مقاماتو سره خپل وخت په قدم وهلو، ټوکو، هغوی ته په خندولو ، ښکته او پورته کېدو تېر کړي. یانې د عبدالله دغه عکسونه له بهرنیانو سره د ښو اړیکو لرلو په مانا نه دي، بلکې دا د هغه بې برنامګي ښیي. هغه داسې څه نه لري چې بهرنیانو ته یې بیان کړي او یا له هغوی سره ورباندې بحث وکړي، نو په همدې خاطر په دغسې عکسونو باندې وخت تېروي.

دا واقعیت دی ځکه چې نوموړي د ټاکنیزو کمپاینونو پرمهال هم ټول وخت په ټوک، مسخرو او پر ولسمشر غني پر بې ځایه او بې اساسه نیوکو تېراوه. نوموړي داسې څه نه لرل چې د خپلو لاسته راوړنو په توګه یې خلکو ته وړاندې کړي او ووایي چې په تېرو پنځو کالو کې یې دا کارونه کړي او دغه لاسته راوړنې لري او په راتلونکي کې دغه برنامې لري چې د هیواد او هیوادوالو په وضعیت کې به د ښه والي لامل شي. نوموړي نه یوازې په تېر کې څه نه دي کړي، بلکې د راتلونکي لپاره هم کومه واضح برنامه نه لري.

 

که نوموړي په تېر کې څه لرلای او یا یې په راتلونکې کې کومه موثره برنامه په لاس کې وای، نو پلویانو به یې له بهرنیانو سره د هغه د عسکونو له لارې د نوموړي د غټ ښودلو هڅه نه کولای، بلکې د نوموړي کړنې، لاسته راوړنې او پرمختګونه به یې بیان کړې او د خلکو باور به یې ترلاسه کړی وای.

 

Comments
Loading...