د افغانستان ارضي تماميت او زموږ سرې کرښې/شهزاد آريوبي

0 26

شهزاد آريوبي-

د مخابراتو او معلوماتي ټکنالوجۍ وزیر

په بين المللي محيط کې د يوه فعاله لوبغاړي په توګه يواځې د افغانستان اسلامي جمهوري دولت له دې خاورې او خلکو استازي کولی شي.

دا هغه روښانه حقيقت دی چې په هېڅ حالت کې نشي نفي کېدی او که څوک وغواړي نفي يې کړي دولت حق لري چې په هر سټيج په دې موضوع وغږېږي، مقابل لوري د بين المللي فشارونو لاندې دې ته تابع کړي ترڅو له دې نظام سره د نظام په توګه برخورد وشي او متقابل دولت په دولت روابط د نورو روابطو ځای ناستی شي.

دقيقا د سولې په موضوع کې ټول ملت اندېښمن دی او دولت ددې ملت د یواځيني استازي په توګه دا موضوع مطرح کوي، ترڅو د ملت اندېښنې حل شي.

البته تر هغه ځايه چې د سولې په خبرو کې د افغانستان اسلامي جمهوري دولت د نقش خبره مطرح ده، نو ډاډه يم چې دا نظام څوک نشي نفي کولی ځکه په دې برخه کې د هر تړون او موافقتنامې د عملي کولو د اجراء ضمانت يواځې او يواځې له نظام سره دی.

افغان امنيتي او دفاعي ځواکونه نن هغه قوت دی چې ددې نظام له هرې پرېکړې دفاع وکړي، د تطبيق مرحلې ته يې داخل کړي او د قدرت مشروع استعمال ددې هېواد د نظام محافظت, د خلکو او د افغانانو د ارزښتونو د ساتنې لپاره ترسره کېږي.

موږ د يوه قانونواکې ولسواکۍ په توګه اړ يو، ترڅو د قانون د تطبيق او د لسواکۍ د ټينګښت لپاره د دولت د قانوني پرېکړو او دريځونو څخه ملاتړ وکړو.

سره له دې، پدې باوري يو ترڅو افغانستان د نړۍ له ټولو هېوادونو سره بايد منظم او په متقابل احترام ولاړ روابط ولري اما دا هم راته د منلو وړ نه ده چې زموږ د حکومت په اداري چارو کې دې بهرني سفارتونه هم نقد او نظر ولري، خصوصا بيا په داسې حال کې چې د غير مسؤولو وسلوالو ډلو پر وړاندې جديت ولسواکۍ ته ګواښ وګڼل شي.

موږ په خپل ملي حاکميت, ارضي تماميت, خپلواکۍ او ولسواکۍ کې هېڅ ډول انعطاف نلرو او په بين المللي روابطو کې دا زموږ سرې کرښې دي.

Comments
Loading...