حکومت ګټه وکړه

سرخط

0 91

ولسمشر غني څو ورځې وړاندې یو ناڅاپه ملت ته د وینا په نوم د ټلوېزیون پر سکرین را څرګند شو او د حقاني شبکې د هغو دريو غړیو د خوشې کولو په اړه خپله کړې پرېکړه یې اعلان کړه چې مخکې به د حکومت سرې کرښې بلل کېدل.
نوموړي وویل، که څه هم په دې اړه پرېکړه ورته ډېره سخته وه، خو په وینا یې، په هېواد کې د سولې او ثبات راتلو لپاره باید ځینې ترخې پرېکړې هم وکړي. حکومت په دغه پرېکړه کې د افغان ـ امریکايي پوهنتون د دوو استادانو خوشې کولو په بدل کې د انس حقاني په ګډون، د حقاني شبکې درې مهم غړي له بنده خوشې کړل.
سره له دې چې د راپورونو له مخې، د حقاني شبکې دا غړي یو ځل قطر ته هم ولېږدول شول، خو پر خپلو ژمنو د طالبانو د نه عمل له کبله بېرته بګرام زندان ته راستانه شول. د راپورونو له مخې، دغه کسان وړمه شپه بېرته خوشې شوي او قطر هېواد ته رسېدلي او طالبانو هم پرون د افغان ـ امریکايي پوهنتون دوه استادان خوشې کړي، ښايي نن او سبا سره تبادله شي.
که څه هم د انس حقاني او دوو نورو طالبانو په څېر د ترهګرو خوشې کول کومه اسانه پرېکړه نه ده او همدا لامل و چې ګڼ‌ غبرګونونه یې را وپارول، خو حکومت په دې کار سره څو ګټې وکړې.
لومړی، حکومت په دغې سختې پرېکړې هغه تورونه ناسم ثابت کړل چې مخکې به د سولې اصلي مخالف لوری یادېدې. د دې تر څنګ یې د تېر په څېر یو ځل بیا د سولې پروسې او په دې اړه د خلکو غوښتنو ته مثبت ځواب ورکړ او لپاره یې خپل ښه نیت ثابت کړ.
حکومت وکولای شول چې د افغان ـ امریکايي پوهنتون د دوو استادانو خوشې کولو په بدل کې چې د خپلو نړیوالو متحدانو، په تېره امریکا لپاره ډېر مهم وو، د درې مهمو طالبانو په خوشې کولو له امریکا سره خپلې نسبتاً خړې اړیکې چې د امریکا او طالبانو ترمنځ د سولې مخامخ مذاکراتو او په دې برخه کې د ځینو ابهاماتو له کبله را منځ ته شوې وې، بېرته ورغوي او د هغوی ملاتړ خپل کړي.
یو تحلیل دا هم کېدای شي چې ولسمشر غني به د ولسمشري په روانو ټاکنو کې چې ورځ تر بلې لانجمنې کېږي او ښايي یو ځل بیا د ۲۰۱۴ کال په څېر د کړکېچ لوري ته لاړې شي، د نړیوالې ټولنې، په تېره د امریکا پام او ملاتړ خپل کړي، ځکه د افغانستان په اوسنیو شرایطو کې د نړیوالې ټولنې، په تېره بیا د امریکا رول له پامه نه‌شې غورځېدلای.
حکومت د انس حقاني په ګډون، د درېوو مهمو طالبانو په خوشې کولو سره افغانانو ته په ډاګه کړه چې د سولې په تړاو د دوی هیلې او غوښتنې پوره کولای شي، خو که مقابل اړخ یې چې طالبان دي، ورته ژمن پاتې شي. د افغانانو تر ټولو ستره هیله او غوښتنه په هېواد کې د روانې جګړې چې قرباني یې یوازې دوی ورکوي او ګټې یې نورو ته رسېږي، پای ته رسېدل او د سولې راتګ دی. که هر لوری په دې برخه کې یو ګام وړاندې اخلي، ښکاره ده چې د خلکو باور او ملاتړ به خپلوي.
نو په ټوله کې حکومت، په تېره ولسمشر غني له طالبانو سره په وروستۍ تبادله کې ګټه وکړه او اوس طالبانو ته هم په ‌کار ده چې د خپلو بندیانو خوشې کولو شرایطو ته په کتو له حکومت سره د سولې مخامخ خبرو ته هم حاضر شي او څومره ژر چې کېدای شي، دا پروسه هم بریالۍ شي، خو که بیا هم پر خپل تېر دریځ ټینګار وکړي، نه یوازې د حکومت، بلکې د افغانانو او نړیوالې ټولنې له سخت غبرګون سره هم به مخ شي.

Comments
Loading...