ازبکستان له افغانستان سره صادقانه همکاري کوي

0 61

په داسې حال کې چې د افغان سولې لپاره د امریکا ځانګړي استازي زلمي خلیلزاد او طالبانو تر منځ په قطر هیواد کې د افغان جګړې د پای ته رسېدو په موخه خبرې اترې روانې دي ، په دې منځ کې د طالبانو مرستیال او د قطر د سیاسی دفتر مشر ملا عبدالغنی برادر د ازبکستان د بهرنیو چارو وزیر عبدالعزیز کاملوف او د افغانستان لپاره د ازبکستان ځانګړی استازی عصمت الله تر منځ په قطر هیواد کی ناسته تر سره شوه .

په دغه ناسته کی د افغانستان د وضعیت په اړه مفصل بحث وشو د طالبانو او ازبکستاني پلاوي تر منځ ډېر بحث په سوله وو او ازبکستاني پلاوي د افغان سولې لپاره د هر ډول همکارۍ چمتووالی وښوده او زیاته یې کړه ازبکستان له افغانستان سره د اقتصاد په برخه کې هر ډول همکارۍ ته اماده دی .

د دغو دواړو لوریو له کتنو وروسته د افغانستان د ملی امنیت مشاور حمدالله محب د دوشنبې په ورځ د ازبکستان مرکز تاشکند ته لاړ او هلته یې له ازبکستاني چارواکو سره د افغان سولې د روان بهیر، د تروریزم او فساد ضد مبارزې، سرحدونو ، نظامي او اقتصادي همکاریو، د مخدره موادو له قاچاق سره د مبارزې او دغه راز د افغانستان او ازبکستان تر منځ د دوه اړخیزو امنیتي همکاریو په اړه بحث درلود.

ویل کېږي د طالبانو او افغان حکومت تر منځ د روغې جوړې په صورت کې ازبکستان دېته اماده دی چې د ضامن رول ولوبوي، په همدی خاطر له ازبکستاني چارواکو سره د افغانستان د ملي امنیت د مشاور لیدنه د دې لپاره هم وشوه چې د افغان حکومت، امریکا او طالبانو تر منځ د روغې جوړې په صورت کې د ضامن رول لوبولو هغه غوښتنې واوري او له نیږدې پرې بحث وکړي .

دغه او دېته ورته ناستې د افغانستان د سولې لپاره ډېرې ګټورې دي ځکه ازبکستان د افغانستان له بې غرضه او ښو ګاونډیانو څخه دی، هر څومره چې د سولې موضوعات له پاکستان او ایران لیرې د ازبکستان او منځنۍ اسیا د نورو هیوادونو په منځګړتوب ترسره کېږي، نو همغومره د افغانستان په ګټه تمامېږي.  

ازبکستان یو له هغو هیوادونو څخه دی چې په دې وروستیو کې د ولسمشر غني په پاملرنه ورسره د افغانستان اړیکې ډېرې ښې شوي او دغه دواړه هیوادونه په خپلو کې د دوه اړخیزو همکاریو، سوداګرۍ او راکړې ورکړې قراردادونه هم لري. بل لور ازبکستان له روسیې سره هم ښې اړیکې لري چې دغه اړیکې د افغانستان او روسیې د اړیکو په ښه والي کې هم موثرې تمامېدلی شي.

ازبکستان که وغواړي، نو د روسانو هغه بدنېتي چې پاکستان او طالبانو د افغانستان په اړه پیدا کړې له منځه وړلی شي او څومره چې په دې برخه کې مناسبات ښه کېږي، نو همغومره د هیوادونو او د سیمې امنیت او ثبات ته ګټه رسوي.  

که ازبکستان د روسیې په همکاری له طالبانو سره د افغان سولی په اړه صادقانه همکاری وکړی نو دواړه هیوادونه کولی شی په ګډه طالبان د افغان حکومت سره د سولی د خبرو لپاره کېنوي تر څو په افغانستان کی تل پاتی سوله راشي .

Comments
Loading...