د کندهار د دردونکې پېښې په اړه/ اجمل اند

د کندهار د دردونکې پېښې په اړه، ارګ او نورو حکومتي چارواکو په لومړي سر کې په بې تفاوتۍ او بې پروايۍ عکس العمل وښود، پرته له دې چې د پېښې درندوالي ته پام وکړي، سرسري پیغامونه یې خپاره کړل. د ولسمشر په ویډیوپیغام کې ان د جنرال عبدالرزاق نوم بشپړ یاد نه شو. د انتقام یا غچ خبره هیڅ کوم چارواکي ونه کړه. مرکزي او سیمه ایزو واکمنو د پېښې د څرنګوالي په اړه تر ډیره رسنیو ته سم جزییات ورنه کړل، او پر ته له اړتیا یې هغه معلومات هم پټ کړل چې دوی درلودل. تر درې ورځو څرګنده نه وه چې والي زلمی ویسا ژوندی دی او که مړ؟ ټپیانو کې څوک شامل دي؟ دا بې پروايي او د معلوماتو په ورکولو کې بې نظمي ددې سبب شوه چې په ټولنیزو رسنیو کې ګڼې اوازې خپرې شي، او داسې پوښتنې راپورته شي، چې خلک پر هر چا او هر څه شکمن شي. زموږ چارواکٍي خو د عمل هسې هم نه دي، پر مهمو مسلو یې خبرې هم داسې ژوولې وي لکه نسوار یې چې خوله کې وي.

ما په تیرو څو کلونو کې له چارواکو داسې وینا یا خبرې نه دي اوریدلي چې د صداقت او خلوص څرک په کې ولګیږي، د عام ولس په ژبه د هغو پوښتنو او اندېښنو ته ځواب ووايي، او د خلکو زړه ته لاره وکړي. بس ویناوې یې لکه د اقتصاد د پوهنځي د څلورم کال پیچلي لیکچرونه وي، چې ان محصلان هم ترې پیټیږي.

Categories: له فیسبوک څخه

Tags:

خپل نظر ولیکۍ

Your email address will not be published.