تر زېږون وروسته ميندي باید څه وکړي؟(۲)/حیا زېور

په مخکنۍ لیکنه کي مو ولوستل چي تر زېږون مخکي باید میندي څلور ځله له ډاکټر او یا هم قابلې سره وویني، خو تر زېږون وروسته هم څلور ځله کتني اړیني دي. لومړۍ کتنه: له زېږونه تر شپږو ورځو باید مور او کوچنی دواړه روغتون ته ور وستل سي چي ډاکټر او یا هم قابله ئې وویني. که چېري د زېږون پر مهال د مور نس ته کوم ګواښ پېښ سوی وي، لړمون چرکي سوی وي، کوچني ته کومه ستونزه جوړه سوې او یا هم د کوچني نو “ناف” مېکروبي سوی وي، همدا ئې د درملني وخت دی.

همدا راز که چېري د کوچني نو خراب تړل سوی وي او یا هم د ژړۍ تر ګواښ لاندي وي، همدا ئې وخت دی. پر دغه مهال د BCG په نوم لومړنی واکسین باید نوي زېږېدلي کوچني ته زرق “ولګول” سي. په اړوند روغتون کي کوچني ته د تذکرې په نوم یو کارټ ورکول کېږي چي ټول معلومات په کښي لیکل کېږي.

دوهمه کتنه: تر ۲۶ ورځو وروسته باید مور او کوچنی دواړه روغتون ته مراجعه وکړي، څو د کوچني وزن، وده او د مور روغتیا او غذايي رژیم وکتل سي. دلته کتل کېږي چي کوچنی وده کوي او که د کومي ناروغۍ له کبله وزن بایلي.

درېیمه کتنه: دا ځل کتنه باید له ۴۵ ورځو څخه وروسته وي او دا ځل بیا نوي زېږېدلي کوچني ته DPT په نوم واکسین ورکول کېږي. د دغي کتني پر مهال مور ته روغتیايي لاري چاري ښول کېږي او تر څنګ ئې که چېري مور په نژدې موده کي بل کوچنی نه غواړي د مخنیوي په اړه همکاري ورسره کېږي.

څلورمه او وروستۍ کتنه: دا ځل کتنه له شپږو میاشتو څخه وروسته پیل کېږي. دا هغه مهال دی چي میندي خپلو نوو زېږېدلو کوچنیانو ته باید خوراک پیل کړي.

په دې کتنه کي ډاکټران کوچنیانو ته د خوراک ورکولو په اړه له میندو سره خبري کوي او هغوی ته بېلابېلي مشورې ورکوي. همدا راز د مور او کوچني له پاره د یو شمېر ناروغیو د تشخیص په اړه معاینات ترسره کېږي. بله مهمه خبره دا ده چي دې کتنه کي روغتیا پالان میندو ته لاري چاري ښيي چی باید له کوچني سره څه ډول مخ ته ولاړي سي، ځکه چي دې وخت کي د کوچني لویښت، ذهن او خوراک ته باید جدي پاملرنه وسي. که ئې لنډ ووایم، د کتنو وخت تر ۶ ورځو، ۲۶ ورځو، ۶ اوونیو او ۶ میاشتو وروسته.

 

لومړس برخه دلته لوستلای شئ:

مېرمني له ولادت څخه مخکي باید څه وکړي؟ /حیا زېور

Categories: بېلابېلې مقالې,روغتیا,غوره شوې لیکنې,مقالې-روانې چارې /ټولنیزې/ سیاسي

Tags: