و دې نه مري/ عزت الله ځواب

0 101

که کافر که مسلمان مري و دې نه مري!
که حيوان مري که انسان مري و دې نه مري
څو غټ خېټي دې له لوړ فشار نه مړه شي!
چې له لوږې نه خواران مري و دې نه مري
هسې نه حاجي چې ته خپله شيطان شې!
ستا په لاس که شيطانان مري و دې نه مري
جينکۍ ورپسې ټولې لېونۍ شوې!
غنمرنګه هلکان مري و دې نه مري!
ډېر بې وسه يوو پوښتنه کوی نه شو!
ډېر ښايسته ښايسته ځوانان مري و دې نه مري
خدايه مور نوره په هېچا بوره مه کړې!
که عسکر که طالبان مري و دې نه مري!
په بمبار کې دهقانان د کلي مړه شول!
په چاودنو کې ښاريان مري و دې نه مري!
ټول د خپل جهل په خره باندې سپاره دي!
پردې جنګ کې افغانان مري و دې نه مري!
خانده مه ځوابه ته به هم مړ کېږې!
ليکوالان مري؛ شاعران مري و دې نه مري!

Comments
Loading...