صدیق کاوون/ سپين ښامار ته

0 61

کور دې ګډ شه استعماره ستمګره
د سرو وینو دوکانداره ستمګره
د غوټیو د موسکا خوني قاتله
د وحشي بادونو یاره،ستمګره
*****
دا وطن به بیا آزاد وي ته به نه یې
مختورن به استبداد وي ته به نه یې
سره ګلونه به پر شنو دښتو غوړيږي
دا غمجن انسان به ښاد وي،ته به نه یې
*****
یوه ورځ به دا ولس بېرته راټول شي
له سرو وینو به راپورته سره غاټول شي
یوه ورځ به لاس درځي ستا ګرېوانه ته
دا بې ژبې بلبلان به غزلبول شي.
*****
یوه ورځ به حساب ټول درځنې واخلي
د دښتونو،د باغونو،د ګلونو
یوه ورځ به د مرګونو ځواب وایې
د نښترو،د شهیدو چنارونو
*****
کور دې وران شه ستمګره استعماره
د ستم پر اورنګ ناست،سپينه ښاماره
پر هرځای چې قدم کېږدې،سره لمبه شي
د دونیا د دوزخو اجاره داره .

Comments
Loading...