زه او زړه / ګلالۍ احد

0 31

نیمه شپه تپه تیاره ده
ګرد چاپيره خاموشي ده
د فضا ربابي ستړی
د شمال تارونه غلي
نه د ونو مستې پاڼې
په خندا دي په نڅا دي
نه د برې چینې څاڅکي
په شرنګا دې په ګډا دي
بس یو زه او یو مې زړه دی
دوه په دوه یې سره پالو
له اروا سره مو پرېښې
له خپل روحه بې پروا یوو
زما او ده یو مجبوري ده
د مطلب د سوال یاري ده
دا کرار راته درزیږي
زه په غلا ورته سا اخلم
دې نه سرې وینې څڅیږي
زه چې نوم ورته ستا اخلم
کله دې کې سره وران شو
یوه نیمه درزا پریږدي
زه هم ضد کې شم راګیره
یوه نیمه سا ترې نیسم
خو اخر مو مجبوري ده
د مطلب د سوال یاري ده
نه مو روح نه مو اروا شته
چې به موږ سره پخلا کړي
نه منطق او نه دلیل شته
چې به موږ دواړه اصلاح کړي
بس یو زه او یو مې زړه دی
چې په تا پسې کړیږو
په خاموشه خاموشۍ کې
غلي تا پسې ځوریږو

– ګلالۍ 

Comments
Loading...