کنګنا ته ډغرو تاوان وکړ

هغه متل خو به مو اورېدلی وي چې خپله ژبه هم کلا ده هم بلا. همداسې کانه د هندي سېنما پر مشهوره فلمي ستورې کنګنا رناوټ شوې ده.
د دې په اړه به مو تر دې وړاندې هم په سرخط کې لوستي وي چې سر و کال يې په جنجالو تېرېږي، کله يې هریتیک روشن راګرځولی وي، کله يې په کرن جوهر پسې خوله پرانيستې وي، خو تازه مالومات دا دي چې اوس ورته خپلې ډغرې په تاوان تمامې شوې دي.

هندوستان ټایمز لیکي، په هند کې د مېس کوین په نامه د دې مشهورې ستورې دې ډول څرګندونو اوس د هغې پر هنري ژوند ډېر منفي اغېز کړی او ان په فلمونو کې یې څوک په اسانه اخیستو ته زړه نه ښه کوي، په داسې حال کې چې وړاندې به یې د کور مخ ته د فلم جوړونکیو کتارونه ولاړ وو.
که څه هم کنګنا وايي، ورته د وړاندیزونو کمی نه دی محسوس شوی، خو پر ګټه او عاید یې ډېر منفي اغېز شوی دی.

دې دا هم ویلي، هیله لري چې د دې مبارزه رنګ راوړي او هغه ستورې چې نوې بالیووډ ته راځي په دې پوه شي چې ټولې ستونزې یوازې هغوی نه لري، بلکې د ډېرو پړه هلکان دي.

سرخط ورځپاڼه

Categories: سینما او فلم