عامر خان او جوهي چاوله هم سره جوړ شول

0 117

د بالیووډ مسټر پرفېکشنسټ عامر خان او د دې سېنما وتلې اداکارې جوهي چاوله تر منځ اووه کلن اختلافات پای ته ورسېدل.
عامر خان او جوهي چاوله پخوا د مینې په اړوند ډېرو فلمونو کې یو ځای کار کړی و، خو اووه کاله مخکې د “عشق” په نوم فلم کې پر یوه کوچنۍ خبره د دواړو تر منځ اختلافات پيدا شول. په پیل کې دا اختلافات ډېر کوچني وو، خو وروسته دومره پراخ شول چې دواړو په کلونو کلونو له یو بل سره خبرې و نه کړې.
عامر خان اوس له رسنیو سره په خبرو کې اعتراف کړی او وايي، له جوهي سره یې هغه وخت دومره اختلافات ژور وو چې له هغې به يې واټن غوره کاوه او د فلم د ډکولو پر مهال يې یوازې د اړتیا له مخې خبرې کولې او په وینا يې کله چې به جوهي د ده خوا ته نږدې شوه؛ نو عامر خان به ترې ۵۰ فوټه لېرې کېده.
خو عامر خان اوس وايي، وروسته له هغې چې يې له خپلې لومړۍ مېرمنې سره طلاق وشو، جوهي ورته ټليفون وکړ، ده ورته ځواب ور نه کړ، خو هغې ورته مسلسل زنګونه وهل چې بالاخره يې دی خبرو کولو ته اړ کړ او په وینا يې په دې وخت کې ورته داسې احساس وشو چې د دوی تر منځ شخړه د دوی دوستي نه‌شي اغېزمنولای.
یاده دې وي چې په ۱۹۸۸کې عامر خان او جوهي چاوله د “قیامت سے قیامت تک” په نوم فلم کې ډېر ښه رول ادا کړ چې تر دې وروسته دواړو پرله‌پسې د “ہم ہیں راہی پیار کے” او “عشق” فلمونو په ډکولو سره په بالیووډ کې د نورو پام ځان ته راواړاوه.

Comments
Loading...