د شاهد کپور فلم پنځه ريکارډونه جوړ کړل 

0 27

څو اوونۍ وړاندې به مو د بالیووډ سېنما وتلي اداکار سلمان‌ خان د تازه راوتلي فلم «بهارت» د ریکارډونو په اړه اورېدلي وي چې په نړیوال کچه یې څومره پیسې وګټلې او د څومره خلکو د پام وړ وګرځېد؟
خو نن درته د دې سېنما بل مشهور ستوري شاهد کپور د «کبیر سنګهـ» فلم په اړه مالومات درکوو چې نه یوازې سلمان ‌خان یې شاته پرېښود، بلکې پنځه ریکارډونه یې هم جوړ کړل.
روان ۲۰۱۹ مېلادي کال تر دې مهاله د شاهد کپور لپاره یو تر ټولو غوره کال دی، ځکه د «کبیر سنګهـ» په نوم د هغه تازه راوتلي فلم یوازې په ۲۴ ورځو کې ۲۵۵ کروړه او ۸۹ لکه روپۍ وګټلې.
د دې تر څنګ دې فلم په درې اوونیو کې پنځه نور ریکارډونه هم جوړ کړل او په دې سره د هندي سېنما د لسو ډېرو پیسو ګټونکي فلمونو په نو‌ملړ کې هم شامل شو.
دا فلم د شاهد کپور یو له زیاتو پیسو ګټونوکيو فلمونو هم یاد شو، ځکه په ډېره کمه موده کې یې له تمې خلاف زیاته ګټه وکړه او د شاهد کپور تر څنګ یې د دې سېنما بل وتلي اداکار رنویر سنګهـ ته لا زیاته مشهورتیا ور وبښله.
دې فلم له هندوستانه بهر هم زیاته ګټه کړې ده، ځکه اوس هندي سېنما یوازې د هند تر پولو پورې محدوده نه‌ ده او اوس یې په نړۍ کې هم زیات مینه‌وال پیدا کړي.

Comments
Loading...