خلیلزاد بیا په ۱۸ ورځني سفر را وخوځېد

0 29

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد د سولې هڅو په لړ کې يو ځل بيا سیمې او یو شمېر اروپايي هېوادونو ته اتلس ورځنى سفر پيل کړ.
ټاکل شوې د خليلزاد په مشرۍ دغه پلاوى د فبروري له ١٠مې تر ٢٨مې په سيمه کې افغانستان، پاکستان، ترکيې، په منځني ختيځ کې قطر او په اروپا کې هم جرمني او بلجيم ته لاړ شي.
د امریکا د بهرنیو چارو وزارت د یوې خبرپاڼې له لارې ویلي، خلیلزاد به په دې سفر کې له افغان حکومت سره د سولې هڅو لا ګړندیتوب لپاره سلا مشورې وکړي.
د افغان سولې لپاره د امریکا د بهرنیو چارو وزارت د ځانګړي استازي په توګه د زلمي خلیلزاد تر ټاکلو وروسته، دا د نوموړي پنځم سفر دی چې سیمې او د نړۍ یو شمېر هېوادونو ته یې کوي.
د خبرپاڼې له مخې، په یاد سفر کې به د امریکا د ملي ګټو پر ټینګښت سربېره د بین‌الافغاني مذاکراتو اسانولو لپاره هم هڅې وشي.
ټاکل شوې زلمي خلیلزاد د روانې میلادي میاشتې په ۲۵مه نېټه په قطر کې له طالب استازیو سره د افغان سولې پر سر بیا خبرې وکړي.
زلمی خليلزاد تېره مياشت په قطر کې له طالبانو سره له پنځه ورځنۍ ناستې وروسته امريکا ته ستون شو او امريکايي چارواکيو ته يې د افغان سولې په بهير کې د شویو پرمختګونو په اړه مالومات ورکړل.

Comments
Loading...