وسله‌وال طالبان په بشپړه توګه له لښکرګاه په شا وتمبول شول

0 47

د هلمند امنیتي چارواکي وایي، طالب وسله‌وال یې په بشپړه توګه د لښکرګاه له ښار په شا کړي خو زياتوي چې لا هم د ښار په ځينو سيمو کې چاڼيز عمليات دوام لري.

د چارواکو په خبره دامهال د لښکرګاه ښار په بشپړ ډول د امنيتي ځواکونو په واک کې دی او وايي، وسله‌والو طالبانو ته له څو ورځو راهیسې د درنو تلفاتو په اوښتو سره دې ډلې د ښار ټولې برخې پرېښې دي.

دوی وایي، که څه هم وسله‌وال طالبان د لښکرګاه له ښار څخه وتلي خو لا هم د دې ډلې پر وړاندې هوایي او ځمکني علميات روان دي، څو په خبره يې ټولې نیول شوې سیمې تېر پاکې شي. په تېرو څو ورځو کې د امنيتي ځواکونو او وسله‌والو طالبانو ترمنځ د نښتو له امله په هلمند کې تر ۵زرو زیاتو کورنیو د جګړو له امله خپلې مېنې پرېښي او امن ځایونو ته کډه شوي دي.

د هلمند ولایت د کډوالو چارو ریاست وایي، تر دې مهاله يې يوازې له ۲۵۰ کورنیو سره نغدي مرستې کړي او اړتيا ده چې له نورو کورنيو سره هم ورته مرستې وشي. ولسمشر غني هم تېر ماښام ټولو اړوندو ادارو ته امر وکړ چې په هلمند کې د وسله‌والو طالبانو لوري د تاوتريخوالي په ترڅ کې بې ځايه شويو کورنيو ته بېړنۍ مرستې ورسوي.

Leave A Reply

Your email address will not be published.