ولسمشر: د تېرو پنځو کلونو په پرتله واردات ۱۴ سلنه راکم شوي دي

0 41

ولسمشر غني په افغانستان کې د ملګرو ملتونو پراختیایي ادارې (UNDP) له مسوول  عبدالله الدرداري سره په کتنه کې ویلي، چې پنځه کاله وړاندې د افغانستان واردات د صادراتو په پرتله ۲۱ برابره وو، خو اوس د وارداتو کچه د صادراتو پر وړاندې ۷ برابره شوې ده او زموږ تمرکز پر دې دی چې د وارداتو او صادراتو بېلانس برابر شي.

له ارګ څخه په خپرو شویو معلوماتو کې ویل شوي چې له نوموړي غوښتي تر څو دافغانستان له هغو ملي برنامو ملاتړ وکړي چې په افغانستان کې د سولې د تامین اواقتصادي ودې لامل کېږي.

ولسمشر نوموړي ته وړاندیز کړی چې د ملګرو ملتونو ټول بنسټونه دې تر یو واحد چتر لاندې راټول او فعالیت وکړي، ترڅو افغانستان او نړیواله ټولنه په اسانۍ خپلو اهدافو ته ورسېږي: «د اوس لپاره مهم لومړیتوب همدادی چې د جګړې له اقتصاد څخه د سولې اقتصاد ته ولاړ شو او جګړه او بېوزلي پایته ورسېږي، ترڅو په هیواد کې اقتصادي ودې ته زمینه برابره شي.»

افغانستان کې د ملګرو ملتونو پراختیایي ادارې یا یو این ډي پي مسوول  عبدالله الدرداري هم د ولسمشر د اقتصادي برنامو او پلانونو ملاتړ کړی او ډاډ یې ورکړی چې په افغانستان کې د لوږې راکمولو اواقتصادي ودې لپاره به خپلو همکاریو ته دوام ورکړي.

Comments
Loading...