طالبان د پاکستان په غوښتنه د غنمو درمندونو ته اور اچوي

0 82

د ننګرهار په کامې ولسوالۍ کې طالبانو په جریبونه ځمکه کې د غنمو درمندونو ته اور اچولی دی او د خلکو د یوه کال ټول حاصلات یې سوځولي دي.

د کامې اوسېدونکي سید زهیر په ټلیفون وویل، بېګاه شپه طالبانو د دې ولسوالۍ د کروندګرو د غنمو حاصلاتو ته اور اچولی دی: «په کامه کې دا لومړی ځل دی، خلک یې ډېر حیران کړي. زموږ ټول دار او مدار همدغه حاصلات دي. موږ نه پوهېږو چې طالبان ولې دا کار کوي؟»

تر دې وړاندې طالبانو په هلمند، لغمان او فاریاب کې هم د غنمو درمندونو ته اور اچولی و.

تر اوسه د دې کار دقیق علت نه دی معلوم، اما د سیمې اوسېدونکي وایي، طالبان د پاکستان په اشاره ځکه د غنمو کروندې سوځوي چې خلک د پاکستان غنمو ته اړ شي او له افغانستان سره د هند د غنمو د مرستې غچ واخلي.

دغه راز په دې وروستیو کې طالبانو د لویو لارو د شنو ونو وهل هم پیل کړي دي چې د خلکو غبرګونونه یې راپارولي دي.

Comments
Loading...