سرچینه: پاکستان د امریکا په غوښتنه په کونړ توغندي ګوزاروي

0 139

په تېرو ۲۴ ساعتونو کې پر کونړ د پاکستان له لوري ۳۰ غوندي ویشتل شوي دي او ملګرو ملتونو ته له شکایت سره، سره پاکستان له دې کار لاس نه دی اخیستی.

د حکومت یو لوړپوړي چارواکي د دغو بریدونو په اړه وویل، پاکستان د امریکا په غوښتنه پر کونړ د توغندیو ویشتل پیل کړي، ترڅو د سولې پروسه کې پر حکومت فشار راوړي: «پرون د امریکا د شارژدافیر امرانه څرګندونې او د هغوی په غوښتنه د پاکستان له لوري د توغندیو ګوزارول ټول د دې لپاره دي چې خپل ټول شرایط له چون چرا پرته په حکومت ومني.»

بهرنیو چارو وزارت له ډيپلوماتیکو لارو دغه شکایت پر ملګرو ملتونو سربېره د امریکا سفارت ته هم په مکتوبي ډول رسولی، چې د ستراتېژیک او امنیتي تړون پر اساس اقدام وکړي، خو امریکا تر اوسه هېڅ نه دي کړي.

د ټولو بندیانو خوشې کول، موقت حکومت منل، په رسمي ډول د ډیورنډ له داعیې تېرېدل او د بهرني سیاست محدودول هغه غوښتنې دي چې پاکستان یې مطرح کوي او په اوسنیو مقطعي شرایطو کې د فشار لپاره ترې امریکا هم استفاده کوي.

حکومت د دې لپاره چې نړیوالو مراجعو ته د سولې پروسې مخالف معرفي نشي، په رسمي ډول د وروستیو فشارونو په اړه چوپتیا غوره کړې ده. هغه څه چې په ټولنیزو شبکو کې یې فعالان هم پر حکومت په غوسه کړي دي.

Comments
Loading...