د طالبانو د ۴۰۰ بندیانو د سرنوشت په اړه مشورتي لویه جرګه غوښتل کېږي

0 38

ولسمشر غني د لوی اختر په مناسبت ولس ته پخپله وینا کې وویل، چې د طالبانو د پاتې ۴۰۰ بندیانو د خوشې کولو صلاحیت زه نه لرم او په دې اړه ولس ته مراجعه کوم.

ولسمشر غني وویل، له ولس څخه د مشورې اخیستو او د دغو بندیانو د سرنوشت ټاکلو په اړه به ډېر ژر مشورتي لویه جرګه راوغوښتل شي.

هغه وویل، موږ د طالبانو د پاتې ۴۰۰ بندیانو د خوشې کولو په اړه منفي ځواب نه ورکوو، خو فیصله به یې هم ولس کوي او هغه هم د مشورتي لویې جرګې په چوکاټ کې.

ولسمشر دغه راز د طالبانو له لوري د اوربند د دوام هرکلی وکړ او سولې ته د ښه نیت ښودو لپاره یې د ۵۰۰ هغو بندیانو د خوشې کولو اعلان وکړ چې د طالبانو په لېست کې نه دي: «د طالبانو د دغو بندیانو په خوشې کولو کې ټولو ولایتونو او قومونو ته پام شوی دی او سولې ته د ښه نیت لپاره خوشې کېږي.»

ولسمشر یو وار بیا غوښتنه وکړه چې اوربند دې تمدید شي او افغان حکومت د سولې لپاره بېساري او لوی ګامونه پورته کړي دي.

Comments
Loading...