تېره اونۍ له افغانستان څخه پاکستان ته د طالبانو ۳۳ جنازې وړل شوي

0 110

په پاکستان کې د بشري حقونو فعاله ګلالۍ اسماعیل وایي، یوازې د تېرې جمعې په ورځ خېبر پښتونخوا ته د طالبانو ۱۵ جنازې وړل شوې دي. دغه کسان د افغان ځواکونو له لوري جګړه کې وژل شوي دي.

دغه راز ۸ نورې جنازې وزیرستان ته وړل شوې دي او ډېری وژل شوي کسان پاکستانیان دي.

د پښتون ژغورنې غورځنګ د رهبرۍ یو بل غړي علي وزیر هم تائید کړې چې په افغان جګړه کې د وژل شویو طالبانو جنازې پاکستان ته وړل شوي دي او نوموړي د افغانستان په تړاو د پاکستان پر پالیسۍ انتقاد کړی دی: «پر دې ټولو سربېره به هم ایا د انسان وژنې پاکستانۍ پالیسي همداسې دوام کوي؟ ایا د پاکستان د څلورو لسیزو سرمایه ګذاري په غرقېدو ده؟ روشنفکره پاکستانیانو ته په کار ده چې د خپل حکومت په پالیسیو غور وکړي. که اوبه له ورخه تېرې شوې بیا دې شکایت نه کوي.»

د معلوماتو پر اساس، پاکستان طالبانو ته هدف ټاکلی چې سږ کال اوړی به د افغان جګړې سرنوشت یو طرفه کوي او خبرداری یې ورکړی چې که کومو جنګیالیو له جګړې سرغړونه وکړه، کورنۍ او اولادونه به یې ووژني.

افغان حکومت طالبان د تاوتریخوالي پر زیاتوالي تورن کړي او په وروستیو دریو اونیو کې پاکستان لسګونه جنګیالي د جګړې لپاره افغانستان ته را استولي دي، خو ګڼ یې دافغان ځواکونو له لوري وژل شوي او نیول شوي دي.

په ټولنیزو رسنیو کې په خپرو شویو ویډیوګانو او تصویرونو کې لیدل کېږي چې په پاکستان کې د هغو جنګیالیو چې په افغان جګړه کې وژل شوي دي، د جنازو او فاتحو په مراسمو کې د غچ او انتقام تبلیغ کېږي.

Comments
Loading...