امریکا: که طالبان تاوتریخوالی کم نه کړي، د سولې هوکړې د ماتېدو امکان شته

0 59

د امریکایي پوځ د مرکزي قوماندانۍ قوماندان کېنټ مککینزي له یوې امریکایي رسنۍ سره په مرکه کې ویلي، که د طالبانو له لوري په افغانستان کې د تاوتریخوالي کچه په اوسني ډول روانه وي، د دې امکان شته چې د سولې هوکړه او د سولې هڅې له ماتې سره مخ شي.

نوموړي ویلي: «هغوی [طالبانو] په محتاطانه ډول پر امریکایي او ائتلافي ځواکونو له بریدونو ډډه کړې، خو د افغانستان د امنیتي ځواکونو پر وړاندې یې په لوړه کچه تاوتریخوالي ته دوام ورکړی دی.»

نوموړي ټینګار کړی دی چې که تاوتریخوالی په همدې ډول روان وي، نو د دې امکان شته چې په افغانستان کې د سولې هڅې ټکنۍ شي.

دغه امریکایي جنرال د تېرې پنجشنبې په ورځ له ولسمشر غني سره هم په همدې تړاو خبرې وکړې او له افغان ځواکونو سره د خپلې همکارۍ د دوام ترڅنګ یې په سمدستي ډول د تاوتریخوالي پر کموالي ټینګار کړی دی.

Comments
Loading...