امریکا سره تر هوکړې وروسته طالبانو نږدې ۱۱ زره افغان ځواکونه وژلي

0 36

طالبانو په قطر کې له امریکا سره د سیاسي هوکړې تر لاسلیک وروسته بیا تر ننه پورې ۱۰۷۰۸ تنه افغان ځواکونه وژلي دي.

ولسمشر غني نن د سام نړیوالې غونډې ته په وینا کې وویل، د سولې پر وړاندې اساسي خنډ طالبان دي او دوی د افغان ځواکونو او ملکیانو پر وړاندې تاوتریخوالی څو برابره زیات کړی دی او دغه وضعیت رامنځته شوی فرصت ضایع کوي: «طالبان لا هم له القاعده سره اړیکې پالي او تر اوسه یې له نورو ترهګرو ډلو سره اړیکې نه دي پرې کړي.»

د نوموړي په وینا، ټول افغانان سوله غواړي او موږ هیله لرو چې سولې ته ورسېږو، موږ خپله ژمنتیا او جرئت ښودلی، بندیان مو خوشې کړي، خو طالبانو لا هم تاوتریخوالي ته دوام ورکړی دی.

د ولسمشر غني په وینا، ډېر ژر به حکومت د طالبانو ټول بندیان خوشې کړي او مخامخ مذاکراتو ته به ورسېږي، خو اساسي شرط دا دی چې طالبان باید تاوتریخوالی کم کړي او مخه یې ونیسي.

افغان ځواکونو ته طالبانو دغه مرګ ژوبله داسې مهال اړولې چې په دې ټوله موده کې یو امریکایي عسکر هم نه دی وژل شوی او ټپي شوی، خو په مقابل کې یې د افغان ځواکونو مرګ ژوبله څو برابره زیاته شوې ده. 

Comments
Loading...