داسې رسټورانټ چې په کثافاتو ډوډۍ ورکوي

0 425

تاسې به رسټورانټونه ډېر ليدلي وي، د لويو لارو د سر هغه، په ښار کې عادي رسټورانټونه او پرمختللي رسټورانټونه چې هره يوه به بېل بېل شکولي ياست، خو راځئ نن په سرخط کې د داسې رسټورانټ په اړه ولولئ چې د پيسو نه، بلکې د کثافاتو په بدل کې خلکو ته ډوډۍ ورکوي.

دا رسټورانټ په اندونیزیا کې دی او تر ټولو جالبه یې لا دا چې مالکه یې مېرمن ده او د دې هېواد تر ټولو په غریبه سیمه کې ودان دی.
د دې رسټورانټ نوم میتهین ګېس کانټین دی. سایوتا چې د دې رسټورانټ مالکه ده وايي، رسټورانټ یې د خپلو خلکو د مړولو له‌پاره پرانیستی او له خلکو څخه يې د ډوډۍ په بدل کې غوښتنه يوازې دومره ده چې له کورونو او کوڅو څخه کثافات ټول کړي او په ټاکل شوي ځای کې يې وغورځوي.

په دې رسټورانټ کې په یوه وخت کې د ۳۰ تنو د کښېناستو ځای شته او ورته په خوراک کې د ماهي غوښه، وریجې، ترکاري سوپ او هګۍ ورکول کېږي.
په رسټورانټ کې د یوه خوراک بیه له نږدې ۳۰۰ افغانۍ سره برابره ده، خو بس د پیسو پر ځای د همدومره پیسو کباړ ور وړل په کار دي.

سرخط ورځپاڼه

Comments
Loading...