کرېکټ؛ امو زون لوبډلې په ١٥ منډو بريا خپله کړه

0 25

د غازي امان الله خان جام يو ورځنيو سياليو په لړ کې د امو زون او مس عينک زون لوبډلو تر منځ د ننګرهار په غازي امان الله خان لوبغالي کې لوبه ترسره شوه چې امو زون په ١٥ منډو بريا خپله کړه.
کرېکټ بورډ وايي، د لوبې په پيل کې پچه د مس عينک زون لوبډلې وګټله او لومړى يې د امو زون لوبډلې ته د توپوهنې بلنه ورکړه.
امو زون په ټاکلو ٥٠ اورونو کې د ٧ لوبغاړو په سوځېدو ٢٦٣ منډې وکړې چې له ډلې يې حيات الله ١٢١ ناسوځېدلې او ابراهيم ٤٤ منډې وکړې.
د مس عينک زون له لوري نواز خان او ضيا الرحمن ٢-٢، يوسف ځاځي او شمس الرحمن ١-١ لوبغاړى وسوځاوه.
د ٢٦٤ منډو د هدف په تعقيب کې د مس عينک زون لوبډلې ټول لوبغاړي په ٤٩.١ اورونو کې وسوځېدل او ٢٤٨ منډې يې وکړې، چې په ١٥ منډو يې لوبه وبايللـه.
د دوى له لوري احسان الله احسان ٥٠، نور علي ځدراڼ ٣٤، ناصر توتاخېل ٣١ او رحيم منګل ٣٠ منډې وکړې.
د امو زون له لوري بيا ميروېس اشرف ٤، نورالله او عبدالله مزاري ٢-٢ لوبغاړي وسوځول.
د لوبې د غوره لوبغاړي جايزه حيات الله ترلاسه کړه چې د خپلې لوبډلې په ګټه يې ١٢١ ناسوځېدلې منډې وکړې.

Comments
Loading...